monumenta.ch > Hugutio Pisanus > Hugutio Pisanus, Derivationes, p21, U 21
Hugutio Pisanus, Derivationes, U/V, , U 20 <<<     >>> U 22

U 21

1  VERBERO -as, percutere, flagellare, unde verberito -as et verbito -as frequentativa, idest sepe verberare; et hic verbero -nis, qui alium verberat vel qui dignus est verberari, Plautus in Amphitrione ‘verbero aut muttitio aut ego ledam te scipione’. 2  Et hoc verber -ris, idest percussio vel flagellum vel impetus pertice librille, vel ipsa pertica, unde verberosus -a -um, flagellosus vel cupidus vel impetuosus vel incisus. 3  Item a verbero hoc verberaculum, flagellum, et verberabilis -le, qui aptus est ad verberandum, et comparatur, unde Plautus posuit superlativum dicens ‘verberabilissime, etiam rogas, non fur sed trifurcifer’. 4  Et hoc verbum -bi, sermo, quia in eius prolatione aer verberatur, unde et quedam pars orationis per excellentiam dicitur verbum, quia frequentius in eius prolatione aer verberatur quam in prolatione alterius partis, unde hoc verbulum diminutivum, et verbosus -a -um, garrulus, nugax, et comparatur, unde hec verbositas, et verbosor -aris, idest verbose vel multum loqui. 5  Item a verbum verbalis -le, verbaliter, et per compositionem adverbium, quasi ad verbum positum, idest verbo adherens vel verbo adiunctum vel iuxta verbum, unde adverbialis -le, adverbialiter; proverbium, similitudo, parabola ubi aliud dicitur et aliud intelligitur, quasi pro verbo positum vel quasi verbum pro alio, unde proverbiolum diminutivum, et proverbialis -le, proverbialiter, proverbialitas et proverbiosus -a -um, et comparatur, unde proverbiositas -tis, et proverbior -aris, proverbia dicere vel proverbiis vituperare. 6  Item verbum componitur verbigena -e, idest genitus de verbis, et semiverbius vel seminiverbius, seminator verborum. 7  Verbero componitur converbero -as, diverbero -as, diversis modis verberare vel disiungere, perverbero -as, reverbero -as, verberando transforare, et est activum cum suis compositis.
bnf15462.297 med275.183